SEMAYA BARU: Bala Iban deka nyadi sebengkah raban ti kaya raja tekala nya enti sema Pakatan Rakyat diberi peluang ngambi Sarawak ari perintah BN.

Dichelak ba lambar belakang surat berita BP hari Enam tu tadi (27 Nov, 2010) bisi salin berita ti mit bendar ti ngenang pasal Opis Tanah (peda gambar di atas). Berita ti baka nya, enda ngasuh kitai tekenyit ati laban iya baka ti sengaja deka dilamun, lalu enda dikemesai ke. Tang utai ti tau ngasuh kitai tekenyit ati, berita pasal tanah ti baka nya tau ga dichelak ke dibacha mensia mayuh.

Uji kitai sama-sama berati ke topic berita nya patut ditulis munyi tu: “Bala Iban deka nyadi sebengkah raban ti kaya raja tekala nya enti sema Pakatan Rakyat diberi peluang ngambi Sarawak ari perintah BN ke diatu”. Tang tuan penyalin berita Borneo Post enda tau ngaga berita nya baka nya. Enti sema iya ngaga topic munyi nya, iya tentu deka dipechat ari pengawa iya ba kompeni surat berita Borneo Post, baka ti udah nyadi ba tuan penyalin berita kompeni The New Sarawak Tribune apin lama ti udah. Tang kami patut meri tabi puji ngagai kepala Borneo Post laban bisi pemerani ngayan ke berita ti bekaul enggau tanah.

Kebuah kami meri puji ngagai Borneo Post laban berani ngayan ke berita pasal opis Commission Tanah, laban berita tu patut ditemu semua orang, ke lebih bala orang ti diau di menua pesisir. Enggau chara tu, tentu mayuh kitai ulih nyadi kaya tekala nya. Enda patut ulih? Enda baka nya. Aram kitai sama berati ke perambu penemu Baru Bian, lebuh iya ngansak opis Commission Tanah dipenyadi suba.

Nitih ke penemu Baru, opis Commission Tanah deka “mansik semua pekara ti bekaul enggau surat pala tanah ti dikeluar ke, lalu pia mega tanah-tanah ti udah digezet, baka ti suah bendar diansak parti (PKR) ngelama tu.”

“Kami kala udah meransang bala orang di menua pesisir nagih chara dikena mutar ke penanggul ti besangkut-paut enggau isu-isu tanah sida ari perintah. Aku kala nyebut tu suba lalu aku mega deka nandu jaku tu. PKR endang mengkang deka ngenan ke penemu iya ba pekara tanah NCR. Kami ukai semina ngira orang bansa asal di menua peisisir aja, tang kami mega deka nyaup bansa China di sebelah nengeri, enggau bansa Melayu di tumpuk pendiau sida.”

Nama utai ti deka diberi Baru Bian? Baru Bian deka ngansak penumbuh opis Commission Tanah. Nama reti opis Commission Tanah? Opis Commission Tanah tu sebengkah opis ti ditumbuhka perintah menua awak ke bisi ngemata ke semua pekara ti bekaul enggau isu-isu tanah.

Bisi tau ke nadai opis Commission Tanah tu diberi kuasa bejalai ke pengawa iya chara ngati ke diri? Bisi. Semua bansa opis commission endang bisi kuasa bejalai ke pengawa sida ngati ke diri.

Enti sema Baru Bian menang dipilih nyadi pengari, lalu parti Pakatan Rakyat ulih bekuasa di Sarawak dikena nukar perintah BN, kami besemaya numbuh ke opis Commission Tanah. Baka ni chara opis Commission Tanah tu ulih meri penguntung ngagai bansa Dayak enggau bansa bukai ti bisi tanah di menua Sarawak tu?

Opis Commission Tanah deka nyukat semua tanah NCL di Sarawak. Tu meh pekara ti kala diasuh Najib kereja Taib ba senentang pengawa nyukat tanah ti dikumbai orang “perimeter survey”. Enti pengawa tu dikereja, deka tau ke enggai perintah BN ngeluar ke lalu meri kitai surat pala tanah ke tanah ti udah disukat nya? Lalu, sapa ti nentu ke garis entara menua ba semua tanah ti disukat nya ila? Enti nitih ke penemu Baru Bian, opis Commission Tanah ukai semina diberi kuasa nyukat tanah, tang mega diberi kuasa ngeluar ke, tau ke meri surat pala tanah ke tanah NCL. Tu mega meri reti, semua pemakai menua enggau pulau galau ti diambu bala Iban deka mega diberi surat pala tanah. Dalam kandang menua nya, ke lebih agi kandang tanah temuda, surat pala tanah kediri-kediri mega deka dikeluar ke, ukai semina surat pala tanah kunsi (communal title).

Enti opis Commission Tanah munyi ti kala diperambu ke Baru Bian ulih tekereja ke pengawa tu, udah tentu bansa Iban nyamai agi ngidup ke diri ba menua diri empu. Surat pala tanah sida iya tentu ulih dikena minta duit jail ari bank awak ke bisi dikena nuduk ke sebarang pengawa ekonomi nunda ke pengerindu enggau pengelandik sida siku-siku. Tu mega meri kitai reti, bansa Iban deka sama-sama bisi peluang baka ti dikena bansa bukai. Tang, ulih tau ke enda chara tu ngasu bansa Iban nyadi bansa ti kaya raya tekala nya? Tentu enda ulih tekala nya. Semua pengawa dagang endang tentu deka napi penanggul (risks), tang pengawa dagang, enti iya mujur, ulih ngangkat ke pendiau enggau pengidup sapa-sapa.

Enti orang ti bempu tanah bisi ngembuan surat pala tanah, sida iya tau nyual tanah sida. Ngena chara tu meh, bansa Iban tau nyadi kaya. Tang enti sida iya pintar, sida tentu enda bejual ke tanah sida ti bepala. Sida iya deka ngemansang ke tanah diri empu. Tu meh siti chara Iban ulih nyadi kaya. Sida iya tau mai kompeni ladang sawit ti besai-besai baka Samling enggau WTK bekunsi dagang, seraya ngemansang ke tanah diri empu.

Ke diatu kompeni-kompeni ladang sawit nya ti bekuasa penuh atas bansa Iban, lalu kompeni-kompeni tu aja meh ti nentu ke bayar enggau penyampau sua sida ngagai orang Iban ti bempu tanah. Tu mega ari ketegal Iban nadai kuasa betawar. Bansa Iban ti bisi NCL endang ditagang Jabu enggau Taib betawar ke pengulih ari tanah sida empu, ari pengawa seduai iya nagang semua tanah NCL enda tau diberi surat pala tanah. Tu meh siti penanggul ba bansa Iban ti udah ngujung ke sida nyadi ulun ba menua diri empu. Terima kasih ke seduai, Jabu enggau Taib.

Enti Baru Bian udah ulih numbuh ke opis Commission Tanah, bansa Iban tentu deka bisi chara ti betul mutar ke sebarang penanggul ti besangkut-paut enggau tanah sida. Tu meh pekara ti ngasuh Jabu enggau Taib takut, sereta remban. Seduai iya takut, laban seduai iya sama nemu sereta mereti ke pemesai reti enggau empa ba pengawa dagang enti Iban diberi surat pala tanah.

Nemu kita, sapa orang ti ngembuan tanah ti pemadu mayuh di menua Sarawak ditu? Bansa Iban. Ukai perintah. Tang, Taib udah mujur bendar ngena Adat tau ke Land Code, nukar semua tanah bansa asal ngagai tanah perintah menua (state land). Udah nya, Taib lalu meri tanah perintah nya ngagai kompeni Samling enggau WTK endur sida nuduk ke lading sawit. Nya meh kebuah iya, bansa Iban enda sebengkah bansa di menua tu ti ngembuan tanah ti mayuh, ukai perintah. Taib udah ngubah semua utai tu. Semua YB BN Taib, enggau YB bansa Iban empu pan besetuju ngundi perambu Taib ti netap ke Land Code dikena ngerampas tanah ari bansa Iban. Diatu, mayuh bendar tanah bansa asal enggi Iban udah betukar nyadi tanah perintah menua diberi Taib ngagai sida sebilik. Enggau bala kroni iya.

Nemu kita: Court Tinggi, Court Appeal enggau Court Perintah Besai udah enda besetuju enggau Taib? Ya. Baka nya meh pekara ti kala nyadi ba pechara pasal tanah bansa asal diatu. Semua court nya udah enda setuju enggau Taib, lalu semua court nya madah ke Iban endang patut bempu lalu bisi kuasa atas tanah sida empu. Semua court nya tadi besetuju madah ke Land Code ti udah ditetap ke perintah Taib udah saru dikena tuan Pengarah opis Tanah enggau Survey. Kes bechara pasal tanah ti bekaul enggau menua sida Nor anak Nyawai udah nyadi ke penuduk ti tegap, ti udah ditemu bala lawyer di menua tu. Kes tu udah ngujung ke sida Nor anak Nyawai tau bempu sereta bekuasa penuh atas tanah pemakai menua enggau pulau galau sida empu bisi tetanggul enggau orang ti ngerampas ari sida. Sebaka enggau kes nya, kes Haji Ramli ti nan ke tanah pesisir menua Melayu mega dipechara belalau ke kes Nor anak Nyawai nya. Taja pan court udah ngeletak lalu netap ke kes-kes nya menang, tang perintah mengkang enda ngeluar ke surat-surat pala tanah.

Perintah BN ukai semina bingking enggai ngeluar ke surat pala tanah ke tanah bansa asal, beduduk ari kes Nor anak Nyawai, tang perintah mega majak deka ngelaban pemutus court tu. Perintah majak ngelaban laban tuju iya ke bendar endang majak deka berampas ke tanah bansa asal, baka pemutus undang-undang kenyau ari taun 2007!

Diatu, kitai udah sama nemu, court udah ngelala bansa Iban endang bansa ti bisi tanah ti mayuh di menua tu, tang ulih enda kini pemayuh tanah tu ngasuh bansa Iban kaya raja tekala nya? Apin ulih tekala nya.

Pekara ti tau ngasuh bala Iban kaya tekala nya enti lebuh kompeni Samling enggau WTK nyerah ke pulai semua tanah bansa asal ti udah bisi pala diberi perintah menua, lalu pia mega enggau semua pun sawit ti benung tumbuh sereta idup atas tanah nya. Semua pun sawit nya tadi tau lalu diempu bala Iban, laban kompeni Samling tau ke WTK udah ditetapka tama enggau chara pejal ngagai kandang menua bala Iban. Ari ti ngambi pulai semua tanah sida ari kompeni-kompeni ti besai-besai nya, tentu iya bala Iban ulih nyadi kaya raja tekala nya. Sebaka enggau chara Taib enggau sida sebilik ti ulih nyadi kaya raja tekala nya udah ti berampas ke reta pesaka orang asal ti endang betemuda-berimba ba menua tu.

Enti munyi nya, sapa deh orang ti bisi kuasa ulih ngubas pendiau enggau pengidup bala Iban? Opis Commission Tanah meh, baka ti diperambu Baru Bian. Semaya Baru Bian tu ukai jaku ngapa. Iya deka ngamat ke penemu enggau jaku iya nya. Kena hari Lima 22 hari bulan Satu 2010 tu tadi, surat berita The Star udah mansut ke: Oil palm firm told to return land to Ibans (Kompeni ladang sawit dipinta meri pulai tanah ngagai bala Iban).

Enti semua kitai tu ngenggai ke BN, lalu ngundi Pakatan Rakyat, Baru Bian deka mega bulih kuasa nuduk ke opis Commission Tanah, lalu beduduk ari nya mega, bala Iban, Orang Ulu, Bidayuh, Melayu enggau bala China mega tau nyadi orang ti kaya raja tekala nya. Ngena pen meh kitai nentu ke utai tu. Laban juluk ati ti baka tu bepanggai amat ba kitai empu, lalu bepanggai mega ba pen ti dikena kitai maya ngundi ila.

Kita pan ulih meh nyadi kaya raja baka Jabu enggau Taib. Chara nya mudah bendar. Undi meh Pakatan Rakyat enggau Baru Bian, awak ke ulih nuduk ke opis Commission Tanah lebuh maya iya menang lalu megai perintah Sarawak. Semua utai tu ulih nyadi nyata. Pecaya meh ke jaku tu, lalu mega meh ke diri empu.



Read the English version: THE NEW DEAL: Ibans will become instant millionaires if Pakatan Rakyat takes over Sarawak.