Tuesday, February 8, 2011

SNAP – Keamat ke penemu kita, tau ke ngetu diatu.

Ke terubah iya, SNAP madah ke diri ninggal ke Pakatan Rakyat. Udah nya iya madah ke diri deka setanah enggau UBF, sebengkah plaform politik. Udah nya iya madah ke diri endang agi dalam Pakatan Rakyat. Tang udah nya bala tuai-tuai SNAP nurun ke KL deka enggau ngulu pengawa bejadi KITA. Udah nya iya madah ke diri agi mengkang dalam Pakatan Rakyat. Paul Kadang nyebut siti pekara. Anthony Liman nyebut pekara bukai. Udah nya Stanley Jugol bebida penemu enggau runding ari dua iko kaban ke dulu tadi. Lalu President sida, Edwin Dundang? Iya nadai didinga nyebut sebarang utai. Nama penyadi ngagai SNAP?

SNAP nyau tau disema ke baka nembiak ti kena serang penyakit schizophrenia. Orang ti kena serang penyakit schizophrenia ditemu baka orang ti maioh macham perangai enggau ulah – ketegal sebengkal penanggol ti nyadi dalam untak. Nembiak schizophrenia nya raya agi laban nembiak nya orang ti apin besai, lalu enda nemu ngaga pemutus ti betul, ti ba maya ti sama mega ngembuan runding beberapa iko nembiak dalam siti undak. Enti sebengkah parti politik didinga meri penerang-penerang ti bebida-bida, nya ngayan ke parti nya udah kena serang penyakit schizophrenia. Penanggol ti baka nya enda manah lalu deka ngemuntan ke pejalai parti. Nama kebuah SNAP beperangai baka nya? Bisi beberapa iti saut ti tau dikarap ke.

Ke terubah, nyangka meh SNAP endang sengaja deka nyarut ke runding semoa orang lalu neju ke kitai ngaga pelaba, nyengkaum kaban dalam parti nya empu. Tu nyangka nya ator serang sida ti betul sereta manah. Tang aku belaba ke SNAP enda pintar baka nya. Chara serang nya tau mangkong pala SNAP empu, ti tau ngujong ke maioh kaban sida deka dituntong penanggol. Tentu SNAP enggai meda kaban iya ti endang enda maioh nya ninggal sereta ngeleka ke parti nya. Enggau tu kitai tau nyimpul enggau siti penemu ti madah ke SNAP endang sengaja deka nyarut ke runding kitai.

Kedua, kes nya tau nunjuk ke kitai nya bala tuai-tuai dalam SNAP berupai enda selubang penemu. Siko ari sida nyebut “tu”, siko ke bukai nyebut “nya”. Tang kitai agi ulih ngampun pengilap enggau penemu ti bebida baka nya. Tang tu tau mai penerusak soh SNAP. Sebengkah parti ti bisi penemu-penemu ti bebida ari siko tuai enggau siko tuai enda ulih begempong lalu berupai enda seperau. Baka ni ko SNAP ulih mutar ke pengawa kempen ba semoa 28 iti penudok ti deka diperebut ke sida enti pengawa ngundi nyau datai ila?!

Ketiga, penemu ti bebida-bida entara tuai-tuai dalam SNAP nunjok ke kitai nya bala tuai dalam parti bisi kuasa ti diperebut ke, enda pia? Anang kitai enda ingat, Paul Kadang diatu benong cheregas ngulih ke sukong enggau penampak nama diri empu dalam SNAP, lalu iya mega tampak ba orang media. Kada enda Stanley Jugol nya berasai ditulak ke tisi, enda selamat sereta bisi ngembuan ati ti chemuru? Anthony Liman enda tau dileka ke pia aja, suah bendar mansut ke penerang-penerang ti sensational dikena iya narit bala media. Berebut ke kuasa endang nyadi ba semoa parti politik. Tang ba sebengkah parti ti deka ngangkat ke diri lalu meresi moa diri, berebut ke kuasa nya ukai pekara ti patut dikereja.

Siti ari tiga iti senario baka ti udah diterang ke di atas nya tau dikena nerang ke nama kebuah SNAP ngembuan ulah ti tau ngasoh orang enda lantang ati, enggau dipeda enda tegap penemu enggau runding. Nya ngayan ke parti nya sebengkah parti ti enda selubang penemu. Lalu sebengkah parti ti enda ulih sepenemu semak ba maya ngundi tu nya parti ti deka tumbang.

Dipeda baka nembiak ti kena serang penyakit schizophrenia nya, SNAP nya endang enda lurus ati. Baka ni ko sebengkah parti politik ti madah ke diri agi dalam Pakatan Rakyat tang sida terang-terang bekaul enggau KITA (sebengkah agi parti ti ngelaban Pakatan Rakyat) enggau UBF (sebengkah agi pelasar politik ti deka direjista nyadi sebuah parti politik ti mega terang-terang ngelaban Pakatan Rakyat)? Pengawa SNAP ti baka nya tau disema ke kitai baka bini orang ti butang enggau lelaki bukai. Dini endor peninggi enggau penampak SNAP ti ditemu endang sebengkah parti politik ti pengambis tuai di Sarawak ti lalu mega kala enggau bejurai sereta besetuju ke Sempekat Malaysia dulu menya? (Enti ba rumah panjai Iban, bini ti ditemu butang enggau lelaki bukai deka ditunggu enggau naka pemerat).

SNAP madah ke diri iya benong ngangkat ke diri lalu meresi moa diri. Manah bendar enti baka nya. Tang sapa bagi tuai-tuai dalam SNAP ti matak jalai? Seraban orang politic ti mereti amat pasal pekara media ti seruran ransing enggau ragak lalu dibantu bala pengurus kempen ti pandai-pandai, bala raban NGOs, raban orang media ti landik? Tau ke seraban orang politik ti udah lelak tau ke setengah lelak? Tau ke, dikereja siko orang aja? Semina Tuhan aja ti nemu saut, laban SNAP empu lalu enda ulih madah ke kitai. SNAP mega enda ulih nerang ke kitai nama reti lambang sida ti baru – siti singkang ti patut diambi-kira sida ba pengawa ti ngangkat ke diri empu nya! Bah! Nama utai ti baru ba SNAP ti ngangkat ke diri baru? Tau ke SNAP patut ngeleka ke leka jako ‘ngangka diri’ lalu ngena leka jako ‘guna baru’. Ba leka jako pekara perubat leka jako “ngidup ke” manah agi dikena nyema ke SNAP ti dipeda suntok bendar penemu deka ngidup ke siko kuda ti lama udah mati ti udah ditumbak ke.

SNAP mega bisi didinga madah ke sida bisi lebih 100,000 iko kaban. Enti munyi nya, nama kebuah ba simposium di Sibu SNAP semina digulu 50 iko orang, ti endor nyau ka setengah ari orang ti datai nya bala kaban PKR ti dikangau ke enggau enda bendar lalu udah nya ninggal ke pengawa sida udah badu makai tengah hari nya? Nama kebuah mimit bendar bala orang ti datai ngulu simposium sida ba hotel Telang Usan kena lemai hari Minggu nya? Kini penungga bala sida ti 100,000 ti bukai nya? Nama kebuah enda bulih 1% ari 100,000 kaban iya enda ulih datai? Kami arap ke abis kurang 1% ari 100,000 kaban sida SNAP datai ba simposium di Kuching awak ke bisi nambah ke pengarap bala orang ti deka mantu parti nya ngena duit bantu (ti didinga kami orang nya nyau mupok-mupok nyurut ke diri ari sida).

Ngenang pekara ti bekaul enggau orang ti mantu SNAP ngena duit belanja, rahsia orang nya udah tekusai lalu ngayan ke sida dibantu siko Datuk bebansa China ti kaya. Datuk nya udah besemaya enggau SNAP deka mantu sida ngena belanja ti mayuh entara RM200,000 ngagai RM2 juta, nitih ni bagi berita angin ti deka dikarap ke kita. Taja pan baka nya, semaya endang tetap deka tinggal semaya, laban kitai sama nemu, ba politik, jako semaya endang tau dikamat ke, lalu suah agi ti balang. Sua ke duit nya diatu nya baru aku ngereja pengawa ke nuan enggau bebendar. Tanya ti agi bemain dalam pala aku diatu, enti SNAP nya amat-amat mayuh duit, nama kebuah apin lama tu udah Edwin Dundang bisi telefon soh sekeda tuai dalam PKR deka nginjau duit dikena melanja simposium di Sibu? Enda ulih SNAP mayar bill ke bilik-bilik hotel ti dikena sida nya? Kada enda udah raun ke menoa tasik Datuk bebansa China nya? Kami arap ke SNAP udah mayar semoa bill ba hotel nya – laban enggai ke penanggol nya tau nambah ke berita-berita angin ti sebubu ngapa ba sebelah pasar Sibu ti ulih ngerusak nama SNAP empu.

Cherita tu nyau nambah ngerindu ke ati bala pemacha. Bala orang ti deka mantu SNAP ngena duit belanja udah dipadah ke “SNAP bisi penyampau tuboh penyukong” ti chukop mayoh, lalu tu tau meri reti, SNAP ulih menang kerusi ti chukop dikena sida numboh ke perintah ti baru. Belalau ke jako semaya ti kelalu tinggi nya,diatu SNAP nyau suntok amat runding enggau penemu nyanda bantu enggau sukong ari PKR, SPDP, PRS lalu pia mega ari PBB. SNAP enda tau enda nunjok ke Datuk China nya sida bisi pemayoh bala kaban ti besai. SNAP nyau belatih nimbak nuju PKR lalu Paul Kadang ditemu bebendar amat bekereja (pemanah iya empu) mujok, nyuap lalu mega ngemba bala pengari PKR awak ke merejok tama ngagai perau SNAP. Paul Kadang ditemu bejalai belaboh ari Lundu nyentok ke Limbang bigiga sereta nambah ke pemayoh kaban tau ke penyukong. Seninjik iya enda bidik, laban nadai siko ari bala pengari PKR ti ditaga ke bediri ila deka masok parti SNAP. SNAP mega enda ulih mansut ke berita enggau penerang ba surat-suratkabar ti madah ke sida udah bulih kaban enggau penyukong ti baru. Enggau nya, nama bansa pemindah bebala mayoh masok ngagai parti SNAP ti deka dipadah ke iya ngagai mensia mayoh? Diatu SNAP nyau nemu nadai siko bala kaban ari PKR tau ke SPDP tau ke PRS tau ke PBB deka tama ngagai SNAP, lalu tu ngujong ke SNAP nyau seneka ati betempa ke berita pasal pemayoh tuboh bala kaban enggau penyukong iya, dikena iya ngulih ke sukong enggau bantu ari bala orang ti sanggup beranak ke puku dalam parti nya. Tang sapa-sapa pan deka berunding, ni penyauh SNAP deka bejalai sebedau pengeruh tau nyadi chiru?

Pekara ti tau ngasoh ati kitai irau iya nya pemayuh kerusi ti diambu SNAP. Terubah suba SNAP bisi 7 iti kerusi. Udah nya ambu betambah nyadi 10. Lalu ke pengambis dudi tu SNAP ngambu deka belaban ba 28 ari 29 iti sitak ti tebal agi diwan pengundi Dayak di menoa Sarawak tu! (Kami belaba ke SNAP enda ngambu deka belaban ba sitak Ba’ Kelalan, siti sitak ti benong diining tuai PKR Sarawak Baru Bian). Nama kebuah ulah SNAP baka tu ngasoh kitai irau ati? Mudah. SNAP enda ulih ngayan ke penerang ti bendar dikena nyukong ambu sida empu. Baka iya deka bemimpi belaban ba 28 iti sitak enti iya enda ulih nentu ke sapa pengari sida ba semoa sitak nya? Enti sema pan, ketegal pengawa ajih, sida bulih 28 iko pengari, bisi tau ke nadai sida perengka-perengka dikena sida kempen mantu semoa pengari sida nya? Berapa iti pampang SNAP di serata Sarawak tu? Udah tau ke bedau sida bejalai betemu enggau bala pengundi sida ba semoa 28 iti sitak ti diambu sida nya? Udah tau ke bedau sida ngidup ke baru Wanita Wing sida ti beguna bendar dikena kempen ari pintu-ke-pintu. Kitai arap ke Datuk China ti besemaya deka mantu SNAP dikena bejalai ke pengawa kempen sida enggau bebendar, ukai semina ngator simposium, bejalai keulu-keili ngenchuri kaban/penyukong ari parti bukai, lalu mansut ke penerang ti bebida-bida dalam media. Kereja patut iya inggar agi ari leka jako, lalu penudok SNAP dipeda bedau tegap sereta entap.

Ba sidi ke penudi tu, SNAP enda tau enda begempong baru lalu ngalus sereta mutar ke pengawa. Ba sebarang pengawa ngundi, nuan enda tau enda beguna ke tiga pekara dikena ngulih ke peluang menang belaban: (i)PENGEREJA PENGAWA, (ii)DUIT, enggau (iii) MAYA. SNAP enda tau enda bebendar ngiga bala PENGEREJA PENGAWA (tau ke ngeluar ke duit ti mayoh dikena meli tulang bala pengereja pengawa); iya mega nyangka tulih ke DUIT (enti sema Datuk China enda matak diri ba minit-minit ti penudi); tang iya tentu enda bisi maya/jam ti chukop enti Kepala Menteri ngemadam ke DUN dalam bulan March, ti diatu semina kurang ari 60 hari? Nitih ke ari gaya enggau gamal ti dipeda, SNAP lalu bedau bisi semoa tiga pekara ba sida, lalu SNAP endang nadai ngembuan tiga bengkah pekara nya dikena iya enggau bebendar nyatup Barisan Nasional ti endang ditemu mayoh perengka dikena kempen, mayoh duit, lalu jam ti chukop.

SNAP enda tau enda beterima kasih laban Pakatan Rakyat udah ngagih ke iya 3 iti kerusi, lalu disadang ulih dimenang iya magang ari ti nyebut ambu ti kelalu tinggi sereta sumbong, enda lurus ati, sereta ngelampat pangan Pakatan Rakyat iya ti tau ngujong ke iya lenyau semoa utai.


Read the English version HERE.

Udah macha SNAP – Sundal Dayak ti bingking?

10 comments:

Anonymous said...

Kaban Antu aku, nama nuan enda nyebut nama tukey cina ke besemaia deka nulong SNAP enggau $$$$ deh? Sebut akih enggai ke orang kitai main sengapa embal...

Anonymous said...

Ko Kibak sida bediri semua alai enda iboh ka Pakatan bisi ka nadai. Enti beke nya SNAP segi spoiler kena BN ngalah ka Pakatan. Sapa rugi enda jera? bala dayak ga enda jera. Beri urang duit njudal ka bangsa diri ga sida. Kaya enda kaya tang bangsa diri disundal sida.

Anonymous said...

Area bukai aku enda nyangkong TANG ba sitak Layar, Kibak @ Tedwin madah iya sigi bediri WITH or WITHOUT PKR or SNAP support. Udah temu ulu lungga politik mensia tu-politik $$$$$, MUA ENDA NEMU MALU-NYUNDAL, enggai mati diempa jagu ai Btg Lupar.

Anonymous said...

TEDWIN Ngumbang udah nipu sida aki aku dalam taun 70an suba (agi iya kereja nyadi sub-inspector Polis). Maya nya iya bepinta ka duit pendahuluan beribu dua ari sapa2 orang ti ka meli rumah. Sampai diatu serepik paku kami nadai meda kena ia ngaga rumah ti ka digaga sida iya. BAKA NYA PENGARI TI KA DIPILIH KITAI DI BETONG-LAYAR?????

Enti udah menang bediri ila kada nda balat agi iya nipu orang Betong-Layar? A tief is oweys a tief!!!

Anonymous said...

Kibak/Tedwin nya siko bansa Iban ti sanggup nyundal keh bansa Iban empu.

Tanya: Bakeni ka arap keh orang ti 'bapa ayam' bakenya?

Saut iya: $$$! Laban $NAP nya pan $UNDAL ga. $UNDAL ARI $ARIBA$!!! The $aribas pro$titute!!!

Anonymous said...

nyak meh, lakin sigi lakin

masalah mentality,

ko cina. lakin ngalih tengah malam, enda ulih dipecaya

nyak meh layin tulah, enda ulih jadi ketuai ba menua diri empu

kerah kerah ajak ti netan ke bansa, bansa ti nadai guna

Anonymous said...

nyak meh, laking sigi laking

masaalah mentality,

ko cina. laking ngalih tengah malam, enda ulih dipecaya

nyak meh laking tulah, enda ulih jadi ketuai ba menua diri empu

kerah kerah ajak ti netan ke bansa, bansa ti nadai guna

Anonymous said...

Bakani kita ka ngela SNAP,sebut aja.Sundal ka,bula ka,penipu ka,sebut dia,anang malu anang kakang.Tang kita ke bebantah ka SNAP tu ukai engau ati ti lurus,tang laban dengki engau pengringat.Nadai aki ini apai indai kita niri ka PKR suba,orang di malaya empu parti nya.Kalong nyadi CM ari SNAP lalu maioh tuai2 kita Dayak ada ari SNAP,ukai ari PKR.Paju ka meh PKR tang anang pedis ati ngagai orang.Enti SNAP tu sundal,kita ke bejai SNAP tu Bansat Sundal,serabut.Enda iboh mantah batang tubuh orang,cermin diri empu.Lawyers ukai semina bechara ke tanah NCR wai,tang tau ngadu ka kes bukai,tang ti kita belandik ke lawywr NCR,berapa iko lawywer kita PKR ke slalu ngadu kes NCR deh?Ngagai nuan antu beduru,beduru munyi rusa pangka peti meh nuan ila,setingkap baka menarat abis ngeli meh nuan ila.Prove yourselves at the expense of no others.If you think PKR can deliver,that's it,why bother wit 'Sundal' unless you are 'gatal'.

Anonymous said...

Manah ga pansik nuan tu ungal Venom Klentit,tang peda aku nuan tu sigi orang ke takut bendar ka pengerembai parti SNAP.Ari nya penemu nuan semina ka ngerichau penemu orang ke betul betul ka ngidup ka Snap lalu mai bala ke macha article nuan sama begedi ke Snap.Ari nya nuan madah ke orang dia sakit untak,ngenyarut ke runding orang maioh,berebut ke kuasa,enda lurus ati,enda tebayar ke bill hotel,nadai machinery parti engau utai bukai.Ditu aku ka nanya nuan,kita ke dalam PKR nadai sakit untak?Nama kebuah tuai kita di Sarawak udah betukar berapa kali?Ukai berebut kuasa nya?Ukai enda lurus ati nya?Ukai nyarut ke runding rakyat nya?.Jako orang tuai,sebedau kitai nikau ke penemu,peresa diri empu dulu.Anang nyadi penyamun ti ngelalau pencuri anang enchuri.Ti SNAP tu lembut,ti parti tu ngarap ka orang.tauka ti parti tu nadai orang,nya ukai ngemedis tauka ngacau kita,kita meh menang,nama utai ngasoh kita irau deh.Enti allocation of seats enda ulih di perandau ka antara PKR engau SNAP,sara arang meh,lebu ga kita kaong kaong madah ke SNAP tu sundal nadai utai,baru temu sapa semut sapa sundal.Antu kami ba SNAP enda takut ke antu ti beduru dalam gambar aja,tang antu dalam PKR udah ngeleput lubang burit ninga SNAP ka idup baru,apin belaban nya akih,baru ninga duru.

Anonymous said...

PKR TOOK THE BAIT SET BY SCH

Senior Sng is not only back in the picture, he is playing a pivotal role in destroying PKR. He is now doing some ‘serious horse-trading’ on behalf of Taib and interestingly not even Antu Beduru is in-the- know.

PKR Liaison Chief Baru Bian has taken the bait set up by SCH. B.Bian announced yesterday that Peter Ato is the party candidate for Tarat. Anybody not -in-the-know who is Peter Ato? He is a salaried staff of Sebiro S/B (100% own by SCH). He is not only proxy of SCH/YDK but also BN trump card.

Should Peter win in Tarat SCH will be too happy to bring him to Demak Jaya to meet YDK and at the same time declare himself as BN friendly assemblyperson, just as what Rayong did.

Make sense folks?