Sekretari Politik ke Kepala Menteri, Abdul Karim Hamzah madah ke kitai jako petenah ti dituju ke suh Kepala Menteri pasal penyalah ‘makai suap’ enggau penyalah salah guna kuasa ukai pekara ti baru.Bala orang ti megai perintah endang seruran bebula ke sebarang berita amat, lalu ditusoi ngagai 7o peratus bansa Iban ti enda besekula tin guan rumah-rumah panjai betaun-taun.
Udah ninga ‘putar-belit’ siku Sekretari Politik Taib nyau nyadi buah kenang orang, dia Karim lalu nimbal pesan jako pandak nengah telefon binching iya ti semina munyi tu: “Ha, ha, ha...” Tu udah ngayan ke iya udah ngelesay ke tanya orang ti mai reti: “Sebut mih, nama utai ka disebut kita. Kami deka mengkang bekuasa.”
Semina siti pekara ti enda dikenang Karim ba Radio Free Sarawak iya nya “bansa China nyau berasai kepapas suh Taib lalu enda tan agi meda bansa bumiputera nya udah nyadi kaya raja sereta mujor”.
Pesan ti munyi tu mih ti nguji dilalai ke bala orang politik ti bekaul enggau Taib tiap kali sida ngusung mensia maioh ti nguan menoa pesisir.
Enti Taib nya amat salah “makai suap” baka ti sikenang bala orang parti penyakal, raban orang ti nyukong Taib lalu madah ke Upis Penagang Penyalah ‘Makai Suap’ Malaysia (MACC) tentu lama udah nangkap iya.
Tang utai ti enda dipadah ke sida ngagai orang maioh iya parti BN beguna amat ke 31 penudok parlimen Sarawak dikena BN megai perintah ba ikas Perintah Besai, lalu sida semina berunding ke Taib aja mih ti ulih mai pemenang, abis nadai nya, menang majority mudah. Nya mega kebuah MACC enggau attorney-general enda ulih ‘negu’ Taib.
Bala raban penyukong Taib mega enda nyebut ngagai rakyat Taib nya mih ti nentu ke pemenang raban elite ti merintah ari Putrajaya din. Tu mega sejalai enggau rambai jako “Ketuanan Melayu”, sebengkah penemu nyarut runding ti enda betulis dalam social contract parti UMNO.
Social contract ti enda betulis tu udah kala dikena Menteri Besai Malaysia ti terubah Tungku Abdul Rahman dalam taun 1957 dikena iya ngumbok parti MCA enggai MIC awak ke besetuju ke penemu, “enti bansa China udah ngemeran ke pengawa bedagang, awak ke bansa Melayu mih nyadi tuai dalam perintah”.
Politik bebelah-bagi
Taib ngereja pengawa: mechah ke penyerakup orang asal ti ukai Islam ti maioh agi tubuh laban enggai ke orang asal bekuasa.
Penangi Putrajaya iya nya takut ke majoriti orang bansa asal tu ninggal ke serakup Malaysia, ti tau ngujong ke pengerugi ti besai ke raban elite ti megai perintah din.
Pekara ti bendar iya Taib endang bisi ‘lesen’ dikena iya ngereja sebarang pengawa nitih ke peneka iya empu. Nya kebuah iya ngasuh Karim ngaga Keretas Putih (White Paper) ti tau dikena iya nagang orang Malaysia aktivit ti ukai asal ari Sarawak tu tama ngagai menoa tu.
Keretas Putih nya mega dikena Taib nagang aktivis ari Sarawak ninggal ke menoa Sarawak lalu “nusoi penyai perintah Taib” di menoa luar.
Enti sebarang orang politik ingin ke “pengaya baka orang dagang lalu terebai ngena bilun kin-kitu”, sida nya patut badu mangku pengawa nya.
Taib, siko lawyer ti pandai, patut nemu nama reti peneka ti bebida. Iya majak ngereja semoa pengawa ti salah ti ngujong ke pengamah nama enggau pangkat iya lalu bebagi ke perapasan ti ulih iya nya.
Taib endang beambi ulih ba raban bansa bumiputera ti enda kaya sereta enda ulih ngulih ke puku dagang ari segi belanja enggau duit jali, nadai kaul dagang, lalu pia mega nadai rekod bedagang ti meruan baka bansa China.
Tambah mega bansa bumiputera kurang ba pengelandik ngereja pengawa enggau chara ngulih ke duit.
Nya mih kebuah maioh orang politik endang seruran berunding ke chara ngulih ke duit ari tabung menoa laban tu mih siti chara ti endang ditemu mujor.
Tu mih kebuah kitai nadai sistem tender tebuka sereta ayan lalu ulih temu mensia maioh.
Ngena sistem tender betutup semua tender enggau kontrak-kontrak perintah dikeluar ke dua, tiga, tau ke manggai 10 kali mar agi ari rega ti bendar, lalu pengawa tu dikereja ngena duit semua orang ti mayar chukai.
Bida rega tender betutup nya tama ngagai kandi orang politik ti ngeluar ke tender projek perintah nengah sapa-sapa orang ti dipilih sida bejalai ke pengawa/projek ngari ke sida.
Sekeda raban bumiputera, nyengkaum bala orang diketu ke ari pengawa enggau orang ti enda agi dibai sida bebagi ke perepasan, enggau orang ukai bumiputera ti maioh tuboh, nyau enda rindu agi bekereja ke orang politik ti baka nya.
Penemu ti deka ke ubah baka ti deka dipeda bala raban orang ti nyukong parti penyakal belalau ke tu.
Di menoa pesisir ba puak menoa Sarawak, penyalah ‘makai suap’ ti dikereja bala orang politik di sebelah nengeri endang enda ditemu orang bansa asal. Penyalah ‘makai suap’ tu mih ti sebaka enggau penyakit riman ti tau ngerusak pemanah kaul raban bansa, tau ngujong ke rega barang niki enggau enda menuku, tau ngemunas ke dagang ti besemekih, tau ngujong menoa tu kurang ngeluar ke asil lalu tau ngujong ke raban serak ti dudi jemah ila nyau bebayar ke utang menoa.
Runding salah nyau berampit-rampit ba orang politik nya ti ngumbai duit ti dipelanja nya ukai duit sida, nama kebuah sida patut irau? Penemu tu datai ari raban orang ti enda bebayar ke chukai.
Maioh orang mega orang ngembuan runding enti sida bisi peluang mangku pengawa baka ti dikereja orang politik nya deka ngulih ke duit ngena chara ti sebaka enti sida udah kiruh betulong ke rakyat.
Orang ti baka Taib nya udah ngerandang jalai ke orang politik ke bukai ngulih ke penguntuong enggau pengaya diri empu sekumbang ti bekuasa enggau nadai berasai malu, lalu maioh orang ti baka Karim nya endang bekereja bebelit ke utai ti lurus, lalu belurus ke utai ti bingkuk, dikena sida ngelantang ke ati tuan sida.
Ba maia ti lama, meri gaji ti manah ke bala menteri enggau orang kereja perintah, bebagi ke peluang bedagang lalu bekena ke semoa macham asil ari raban bumiputera dikena beranak ke puku mih chara dikena ngemunas ke penyalah ‘makai suap’.
Enti semina ngarap ke nusoi cherita bendar pasal penyalah perintah Taib, nya ukai chara dikena ngelaboh ke iya.
Baka nya mega, enti ngarap ke bala kaban politik ari parti penyakal ti begedi ke pengawa kamah Taib nya dikena ngulih ke sukong bala pengundi pan apin tentu mujor. Dokumen-dokumen ke pemendar penyalah iya nya udah kelalu maioh lalu tau ngujong ke dawa tau nyadi enda ‘bisa’.
Siti chara ti tau dikena orang aktivis di dalam enggau luar menoa Sarawak mai pasal cherita chara Taib ngulih ke pengeraja enggau chara ti salah ngagai forum entarabansa iya nya minta perintah court entarabansa di menoa tasik ngemeku ke semoa pengeraja nya, lalu mega minta court entarabansa nya ngeluar ke waran tangkap dikena nangkap Taib, sida sebilik, orang-orang kereja perintah ti setanah enggau iya enggau bala kroni-kroni dagang iya.
Di menoa Sarawak, raban parti penyakal patut enggau naka ulih ngayan ke pemendar parti ti megai perintah udah kala ngemedis sebarang orang ngena chara betenah ke penyalah orang nya ti tau ngujong ke penyarut nyadi ba tugong orang maioh.
Tu mih siti chara ti dikena Parti Bersatu Sabah (PBS) dalam taun 1985 dikena sida numbang ke parti Berjaya ti betuai ke Harris Salleh. Mensia maioh ti ringat ukai semina ngerejister diri nyadi pengundi, tang mega nurun ngundi magang-magang.
Chara ti sebaka mega dikena Hindraf dikena sida mujok pengundi India dalam pengawa bepilih besai taun 2007-08, ari ti nerang ke pekara-pekara ti deka didinga bala pengundi.
Pekara ti dikejako ke Hindraf nya nyengkaum pasal orang ti ngerusi kuil endur sida sembayang, pasal bansa sida ti megai pengarap Hindu ditukar nyadi Islam, pasal kes-kes Hindu ti didawa dalam court-court Syariah, pasal raban polis ti kasar enggau munuh nembiak India ti benung ditan ke, enggau pasal sekula Tamil enggau jako Tamil.
Nya alai, endang patut mih Radio Free Sarawak ti ditabur ke ngena jako Iban enggau jako Melayu, bisi tanggung pengawa ti mai besai pangka ngagai orang ti diau di menoa pesisir di tengah-tengah menoa Sarawak tu, ti selama tu udah diiru enggau penemu siru “anang ngelaban perintah” enggau ti lama amat udah ‘dirampit penyakit’ andai, andal sereta seruran ngarap ke ke bantu-bantu baka subsidi-subsidi.
Tebal agi mensia tin guan menoa tu mega enda macha suratkhabar, meda internet enggau telefon binching. Tang berita agi ulih datai ba sida tu nengah Radio Free Sarawak, ti mega ulih didinga nengah internet – sebengkah radio ti ukai dikemata ke perintah.
Read English version: MUST-READ: Exposing distortion will not help bring down Taib
No comments:
Post a Comment