Monday, March 14, 2011

Timbal aku ngagai Anthony anak Ibong

Post tu ditujuka aku suh Anthony anak Ibong ti udah nulis siti artikel: Azmin, get a grip

Stanley Jugol udah gagau bendar mansutka penerang ba suratkhabar ti endur iya nusui pekara-pekara ti manah pasal SNAP. Iya nusui pasal baka ni SNAP deka belaban ba 28 iti kerusi lalu ngumbai PKR nya sebengkah parti ti rangka laban enggai magi SNAP lebih ari 3 iti kerusi agi. Iya madahka PKR nya rangka lalu enda lurus ati.

Aram kitai sama-sama beratika pekara-pekara ti bendar lalu mutuska runding kitai empu, sapa ti rangka enggau sapa ti enda lurus ati ba kaul tu.

Kenyau ari taun 2009, PKR udah mupuk-mupuk nanam leka ubah ba ke semua 29 iti sitak kerusi ti mayuh agi pengundi Dayak. Bala orang ti bekereja enggau PKR udah enggau chara senyap-senyap ngatur pejalai sida ba semua sitak nya, tang SNAP nadai dipeda kenaya, nadai dipeda semengat.

Diatu, nyau udah tembu bumai lalu datai ba maya ngetau, parti SNAP lalu tedani lalu bejaku, “Aram kitai ngetau ba 28 ari 29 sitak ti udah dipumai PKR.” Sapa ti udah ngelabuhka benih lalu bumai ngelama tu? SNAP tauka PKR?

Patut tauka enda SNAP tak tama umai orang lalu ngerampas semua ketau ketegal iya ti ngumbai diri ngarika raban bansa Dayak, lalu madahka diri nya bisi penampak dalam cherita lama parti Dayak?

Dikena nambahka pengerusak, semua kitai nemu SNAP endang nadai perengka ti chukup sereta meruan, tauka pengari. Nya alai SNAP lalu regap-regap nguji ngerampas bala penyukung PKR. SNAP mega bisi ditemu mujuk pengari PKR awakka ninggalka PKR lalu tama SNAP. Tang nadai siku udah bala penyukung tauka pengari PKR deka tama ngagai SNAP. Nama pengawa udah dikereja SNAP?

SNAP bejaku nengah suratkhabar enggau ba media arus internet, dalam blog-blog enggau facebook, iya begunaka 28 iti penuduk tang belalai-belalai minta PKR ngelepaska pengari sida lalu ngasuh PKR bediri ngena tiket SNAP. Baka ni ku kita nyebut tu?

Enti ba rumah panjai kitai, sapa-sapa orang ti ditemu ngenchuri utai orang bukai deka ditinggang adat ti berat. Patut kitai nunggu SNAP laban sida nguji deka ngenchuri pengari PKR? Ba mua mensia mayuh SNAP nyebut pekara siti, tang ari belakang iya bebendar amat mujuk pengari PKR ninggalka parti PKR lalu bediri ngarika SNAP. Nya alai, sapa ke bendar iya rangka?

Diatu kitai sama nemu SNAP terang bendar udah bekaul enggau UBF enggau KITA enggau MCLM. SNAP udah terang bendar ngaga kaul enggau raban-raban nya ti benung beripih angkat ngelaban PKR tauka Pakatan Rakyat. Tang kenu ku SNAP, iya mengkang sebilik enggau Pakatan Rakyat. Nya alai, baka ni ku penegap runding SNAP? Sekali ke SNAP dalam Pakatan Rakyat, tauka ngelaban Pakatan Rakyat? Enti ba rumah panjai kitai, sapa-sapa bini tauka laki orang ti ditemu butang enggau lelaki tauka indu bukai deka ditinggang adat butang ti berat. Patut tauka enda kitai nunggu SNAP ketegal butang?

Ba sebengkah aum besai PKR Sarawak, kaban SNAP bisi diambi enggau mendingka aum. Bala kami dalam PKR mega bisi madahka Stanley Jugol enggau anak iya nerima jaku tesau kami nya. Bisi tauka nadai seduai iya datai ngulu aum kami nya? Kitai deka tetemuka saut iya ditu:

None of the Snap leaders attended today's PKR convention despite being invited. "They must be very busy," Anwar said in jest.

“Nyangka nya bala tuai-tuai SNAP agi benung kiruh magang diatu,” piaku Anwar nyebut enggau jaku tundi.

Jaku Anwar tau dibacha ba artikel tu: Anwar: Only candidates with integrity for S'wak

DAP diarika YB Chong Chieng Jen enggau YB Violet Yong enggau dua puluh iku bala kaban parti sida, lalu PAS diarika Tuai Nembiak sida Fidzuan enggau raban iya. Tang bala sida SNAP endang nadai dipeda, lalu kerusi-kerusi ti endang ditagaka sida puang magang-magang.

Sehari udah nya, PAS bisi ngatur sebengkah forum ti bekaul enggau issue-issue tanah NCR enggau penanggul rampas tanah. Maya nya SNAP bisi diambi mendingka forum PAS nya lalu gambar mua Edwin Dundang mega bisi ditampal ba kain rentang panggau begulai enggau bala tuai-tuai Pakatan Rakyat ti bukai. YB Chong bisi datai ngarika DAP lalu Baru Bian mega bisi datai ngarika PKR. Tang bisi bala sida SNAP datai?

Lalu Stanley Jugol majak rauh-rauh madahka bala PKR enda lurus ati enggau iya. Sapa ti bendar iya enda lurus ati?

Anthony anak Ibong enggau sekeda orang ti sebaka penemu enggau iya rindu bendar ngenang penampak SNAP dulu menya. Tang Anthony engka udah enda ingatka bala tuai-tuai dalam SNAP ke diatu baka sida Edwin Dundang enggau Stanley Jugol nya bala orang BN?

Ditu kami deka nangkan Anthony pasal sekeda pekara ti bendar: SNAP enda kala ninggalka BN. SNAP ditendang BN. Tang udah BN beratika sida bisi peluang begunaka SNAP dikena mechahka undi Dayak, BN lalu ngerejista baru SNAP. Tu mih pemendar ti enda tau dipelalaika SNAP, tauka ngeluluka diri enda ingat ke tu. Tau kitai ngumbai BN ti udah ngerejista baru SNAP dalam kandang ti enda lama nya pengawa ti lurus lalu nadai kebuah bukai?

Dalam kandang tiga bulan tu udah, SNAP udah gagau bendar nyerang Pakatan Rakyat, lebih agi PKR. Bisi kitai kala ninga SNAP mantah Taib tauka BN? Patut tauka enda kitai berasai alit ati nama kebuah SNAP enda engkeretik ba pasal BN? Awakka aku madahka nuan nama kebuah.

Sebengkah penerang ti bisi diterima aku ti madahka Stanley Jugol udah madahka sekeda pengarang suratkhabar ti endur iya nyebut SNAP endang enda mantah BN laban SNAP agi begunaka sukung enggau bantu ari BN! Ya, Jugol endang bisi didinga nyebut jaku nya suh bala pengarang suratkhabar! Leka jaku ti nyemetak disebut Jugol munyi tu “kami (SNAP) begunaka duit bantu pengawa pemansang ari BN”.

Nama kebuah pekara tu tau nyadi? SNAP tentu minta bantu BN ari segi belanja, laban siku taukey China di KL ti besemaya deka melanja sida, diatu udah ngelarika diri lalu enda temu sida penunga.

Antu Beduru ulih belabaka utai tu nyadi beberapa bulan ti udah, tang siku pan bala kitai enggai arapka utai tu. Pengamat enggau pemendar udah ngayanka diri, lalu taukey China nya udah lesap nadai temu penunga, lalu nadai mega udah meri sida sesen! Nya kebuah SNAP diatu nyau pulai baru ngagai tuan lama iya: BN!

Enti SNAP minta pelanja BN, enda ke SNAP nyau nyadi kaki-jari BN/Taib dikena mechahka Dayak ke sekali tu?

Nya alai, enti SNAP majak ke diri ngulihka semayuh kerusi PKR Dayak awakka dikena ngalahka Pakatan Rakyat ba pengawa bepilih besai tu ila, lalu ari nya semua kerusi Dayak tau pulai ngagai BN magang. Enda ke serak tu BN deka sekali agi nyual bansa Dayak ngagai Taib Mahmud?

Diatu kitai patut nanya diri empu tanya ti lurus. Ni maya Endwin Dundang seduai Stanley Jugol udah didinga ngelaban penemu Taib tauka BN? Ngena peluang nya mih seduai iya enggau ati ti gaga pulai baru ngagai kaul BN dikena seduai iya ngisi kuchik seduai empu. Ni maya Dundang enggau Jugol kala didinga ngarika raban Dayak ngambi pulai hak sida atas tanah NCR? Nyau diatu sida iya ke bisi didinga bejakuka pasal hak.

SNAP dipeda kitai baka parti internet ti landik ngatur symposium din enggau ditu. Tang ba dunya nyata tu, SNAP endang ditemu kitai enda kebut-kebut, tauka ngembuan perengka dikena kimpin enggau kaban ti chukup ngereja pengawa ke sida. Baka tu gaya parti ti deka ngarika raban bansa Dayak?

Enggau tu, Anthony anak Ibong, aku enggau basa deka ngasuh nuan nimbal semua tanya ditu. Aku mega minta Edwin Dundang enggau Stanley Jugol nyaut tanya aku tu. Raban bansa Dayak patut diasuh kitai nemu semua pemendar. Ngelama-lama tu bansa Dayak udah dibelit lalu dikelakar Taib, lalu Taib enggau BN deka sekali agi ngena SNAP mechahka Dayak. SNAP – bala tuai-tuai kita ke diatu meri malu ke penampak nama parti kita ngena tipu enggau semaya kusung sida nya.


Udah macha George Lagong - pengari SNAP ba Baleh?

12 comments:

Anonymous said...

Amat George Lagong menyadi Datuk Sng deka bediri ngarika SNAP di Baleh?
Pu neh...SNAP udah dibeli Datuk Sng!!

Mar agi meli belacan ari meli undi Iban, ko Datuk Sng suba...

Anonymous said...

Vernon@antu beduru enti ka datai manah ngagai opis SNAP nyamai beradau anang suka ati rindu ngaga cerita program gossip malodi ba blog nuan ditu be gentlemen. TQ

Anonymous said...

Nya iya, Anthony Liman bediri ngari ka SNAP ba sitak Krian. Enda kala aku ninga rita Anthony Liman bisi udah bejalai di Krian. Nama kebuah iya lari ari menoa Selangau tauka Kakus?

Augustine Liom pan sama baka Liman, sama lari ka Kawasan selangau. Gaga homework seduai dulu..ok

Snap ngumba kediri deka bediri ba semua 28 iti kerusi Dayak, nama hal enda bediri ba 71 iti kerusi?

Tempik dada tanya selera.

Anonymous said...

Datuk,
Bedau puas ngbelik ka bala dayak. Enti SNAP ulih menang kerusi lebih PRS ela gaga iya laban ulih iya meri Taib utai kena muai PRS lalu anak iya Larry ulih jadi full minister ela deh. Bak iya rega dayak nadai rega semena jadi sundal iya.

Anonymous said...

Anon 8.33,

Ulih aku betemu gau d ngal ? Meri aku no. tel ngal ?

Aku ka mai d berandau ruai bejurai ka politik lebih2 agi pasal pemendar SNAP tu amai ulih ngari ka bansa Dayak

apai irau said...

Terima kasih ke penemu ke di pansut ke antu buyu ditu.Tang ari peda mata aku,artikel ia tu ukai berindik ba facts ke betul,tang ari pelaba enggau salah sangka sereta enggau pengeringat,lalu nadai siti pan utai ke di pansut ke ia bisi bukti tauka proof,enda ngipak ke kerja enggau loyar Baru,loyar ti pandai mantai ke bukti tauke proof.Ti ngumbai SNAP rangka,nama kebuah PKR minta bediri ba 52 iti seats lalu mina ka meri Snap 3 iti? Sapa empu Sarawak tu,Azmin?PKR? Ari taun 1998 PKR udah bediri ba maioh seats di Sarawak,berapa iko menang? Ka madah kediri kering enggau rekod ke bakanya? Kedua,pasal perengka enggau pengari SNAP,utai tu hal SNAP,ukai PKR.Ti ngumbai PKR maioh duit,manah machinary lalu manah pengari,nama kebuah ka siko Dominic ng aja menang ari taun 1998?Ketiga,ti PKR madah ka Edwin Dundang enggau bala bukai bekas orang BN,bah kati ko boss besai PKR,DS Anwar deh? Ke-empat,nuduh SNAP di register baru ulih BN,tu pemula ke pemadu besai.SNAP ukai di register baru,tang SNAP udah menang bechara sampai ba Court of Appeal lalu parti tu di putus ke court sigi nadai penyalah lalu sigi agi ngena nombor register ke lama.Nya alai,enti antu buyu ka bula,anang bula ba blog,enda semua orang ulih di kemula.Kelima,antu buyu madah ke sida SNAP enda kala mantah Taib,tu mega bula lalu nanda ke ia enda macha surat khabar betaun ke udah.Tang aruh antu buyu enda kala macha surat khabar di Sarawak laban ia kiroh nyaga bala artis di Malaya baka Ning Baizura.Nya alai,pesan aku nagai Antu Beduru,anang nyadi antu buyu,ngeregau orang.Cermin bala kita ke ba PKR dulu baru bejako ke orang bukai.Siti agi,belajar bejako ngena facts,lebu ga nyaga blog lawyer enti enda nemu pasal facts,proofs enggau perception.Anang pedis ati wai enti pagila lusa bala kita PKR bisi nemuai ngagai SNAP,ukai SNAP mujuk mai,tang peda gaya kita ke dalam PKR diatu. Regards.

Anonymous said...

tu meh pengawa bala dayak iban....semina ka bekelakar aja tang nadai siko ti tau mai penemu ngempong iban...ketegal SNAP VS PKR.

Chronicles of laya iban dalam politik....Kalong dibuai ganti tawi..SNAP nyadi penyakal...tumbuh PBDS....masing ngelaban tajem....tumbuh PRS...

enda ngutuk larry sng ka ngelaban masing laban ia bechunto ka masing ti udah ngelaban tuai parti.

aku minta bala kitai begerempong ba siri perau...anang baka ke udah..uji peda kitai PBB bisi iban, SUPP bisi iban..enda ibuh aku nyebut PRS enggau SPDP...di kumbai sigi parti iban...diatu PKR berebut ga kitai iban masuk kia...tang org enda milih kitai iban...for them iban is always do belakang kira....berunding meh..nama kebuah kitai enda ulig begerempung dalam siti parti???

Anonymous said...

Niang party Snap sigi enda bolih siti kerusi.Anang arap party Snap, udah nadai peminat agi, nadai umm.

Anonymous said...

ngagai pengundi n34 arap ke anang ngundi candidate snap laban parti snap tu parti sampah parti ti nadai olih ngari ka kitai iban

Anonymous said...

ngagai pengundi n34 arap ke anang ngundi candidate snap laban parti snap tu parti sampah parti ti nadai olih ngari ka kitai iban

Anonymous said...

mayuh mai ku ninga urg bjakok pasal snap, tekenyit mimit gak ninga sidak tuk baka last minit jak nyemetak. tapi asai aku sidak agik bc peminat lamak sidak empu... tik ulih bagi gak endur sidak ia, uji endur tik majority iban awak snap megai ia, area tik kurang kitai iban awak ke pkr. bebagi seduai ia.

Anonymous said...

nda iboh bebagi ka krusi ngau snap...awak ka snap ngati kadiri...nadai guna nyukung sida iya...nti menang ila alu merejok baka raong...peda kita yb engkili..maya bepilih suba ngutuk bn...udah menang alu nusok pelir bala pemesai bn...sida snap tu mina sayau ka pangkat ngau duit aja...nti snap maya niang stephen kalong ningkan suba amat meh ngari ka kitai dayak...snap diatu nyadi ulun bn aja..